事源上年聖誕，本來諗住同個好有才華嘅朋友仔喺多嚿嘢門市（70呎）搞個小型event，仲一早喺新填地街一嘢訂造咗100塊玻璃鏡，點知疫情反反覆覆，為咗大家安全，唯有無奈取消活動。
後來一周年前夕，想整啲嘢留個紀念，望一望屋企堆鏡，又望一望舖頭啱啱入嘅Vintage廣告鏡，咦！喂！不如就整屬於我哋舖頭嘅廣告鏡！念頭一著就即刻做資料搜集，研究以前啲廣告鏡點做再動手試做，歷經四個月嘅Trial & Error，終於成為依家你哋見到嘅成品。
廣告鏡（Advertising Mirror）係以前嘅店舖用宣傳品，鏡比紙張印刷嘅海報耐用、美觀，掛岀嚟仲可以做裝飾品添。就算店舖之後執咗，啲廣告鏡仍然掛喺唔同地方，好似會一直存在咁。多嚿嘢都想有塊長存世間嘅廣告鏡！
當時係用絲印技術（Screen Printing）將圖案印上鏡面，以為好易，但實際做落先發現有好多問題，例如高清玻璃鏡係會有嚴重重影，要重新典過張圖令圖文更清晰、對錯位要砍掉重練是閒事，最煩係鏡面太平滑，一般油墨抓著力不足，一刮就甩。最後搵到合適嘅特殊金屬油墨，顯色度高又實淨，但一掂到就好難洗得甩，要用天拿水洗手都算，洗網洗到成個浴室都係黑色油墨，至今仍然未洗得甩⋯⋯而且每印完一隻色就要放平風乾24小時，先再印第二隻色，啲鏡放到周圍都係，期間粗心大意嘅男店主打爛咗幾塊鏡，仲搞到隻手爆晒缸，成地血🤡不過成品我哋係好滿意嘅。
《多嚿嘢一周年紀念廣告鏡》限量50塊（太多真係搞唔掂），並附送V.I.P.卡乙張，以答謝大家一年來嘅支持。實木框架背後有掛勾㗎，希望你會掛住我哋啦，多謝！